Moderna vivo

BELGIO

Miliono da eŭroj por Loveno

En la urbo Loveno (Leuven), meze de Belgio, troviĝas ne nur la ĉefsidejo de AB Inbev, konata interalie pro la biermarkoj Stella Artois kaj Budweiser, sed ankaŭ la plej malnova plu funkcianta katolika universitato de la mondo. Al la 100 000 loĝantoj ĝi aldonas 50 000 studentojn kaj milojn da esploristoj. Ankaŭ ĝia interuniversitata centro por mikro-elektroniko IMEC altiras esplorantojn kaj novigistojn.

Ne nur pro tio fine de septembro la Eŭropa Komisiono aljuĝis al Loveno la prestiĝan titolon „Eŭropa ĉefurbo de novigado”, kun akompana miliono da eŭroj. Pli ol teknologian novigon, tiu titolo agnoskas „la bonegajn novigajn konceptojn de Loveno kaj ankaŭ procedojn kaj reg-modelojn por krei kadron, kiu vivigas ideojn”.

Kovimo

Tiel Loveno komence de la pandemio kiel unua kreis retan platformon por konekti volontulojn kun helpbezonantoj, platformon transprenitan poste de multaj aliaj urboj en la mondo. Agnoskon ricevis ankaŭ ĝia „klimata strato”, kiu agas pri daŭrigeblaj hejmoj, moviĝado, konsumado kaj pli.

Loveno en 2020 gajnis kontraŭ interalie Vieno, Rejkjaviko, Milano kaj Gento. Ĝi iĝis la sesa gajninto post Barcelono, Amsterdamo, Parizo, Ateno kaj Nantes. La urbo preparas sin ankaŭ por la titolo de Eŭropa Kultura Ĉefurbo en 2030.