Scienco
AKTUALE
La etikedo fariĝas inteligenta
Fakuloj el la esplorcentro ENEA de Portici [pórtiĉi] (provinco Napolo, en Italio) ĵus patentis sendratan temperatur-indikilon, por ke eblu monitori la konservo-staton de velkemaj produktoj en la fakoj agro-nutra kaj medicina.
La indikilo, enigebla en la etikedon, ne bezonas pilojn aŭ sensilojn kaj kapablas informi per simpla „jes/ne” pri superado de antaŭdifinita temperatura sojlo, enmemorigante la donitaĵojn.
Malvarmo-ĉeno
La indikilo funkcias per la teknologio RFID (Radio-Frekvenca IDentigo, angle Radio Frequency Identification). La pionira sistemo povas esti uzata en la malvarmo-ĉeno, precipe en la kampo de loĝistiko de rapidputraj varoj kaj en ĉiuj okazoj, en kiuj necesas konservi iun stokadotemperaturon.
Profito por la medio
La sistemo havas malaltan produktokoston kaj funkcias sen pilo (kun klaraj ŝparo kaj profito por la medio). Ĝi povas detekti varmo-eventon, registrante la informojn rilatantajn al iu nedezirata temperaturpinto en la momento mem, kiam ĝi okazas.
| Tiu ĉi teksto aperis en la presita kaj en la PDF-forma versioj de Monato en la jarkolekto 2021, numero 02, p. 17. |
|
Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton:
Artikolo de Cristina Casella el MONATO (www.monato.be). Lasta adapto de tiu ĉi paĝo: 2021-01-06 |