Noticoj

Sirio

Chris Van Thielen volas mendi manĝon de siria restoracio en Antverpeno, sed petas, ke ŝia filo faru tion, ĉar mankas al ŝi mono en ŝia konto. „Mi repagos al vi la venontan semajnon.” Decidite, farite. Kelkajn tagojn poste Chris reĝiras la kostojn al sia filo, rondigas la sumon, kaj kiel pagkialon ŝi aldonas simple „Sirio”. Li ja scias, pri kio temas. Kial do mencii amplekse „Jen la mono por la siria manĝo”?

Sed kelkajn sekundojn post la pago en ŝia bank-apo aperas la mesaĝo: „Bv. tuj informi vian bankon pri la celo de via pago kun mencio ‚Sirio’.” Kaj du minutojn poste retmesaĝo: „Kiel financa entrepreno gravas al ni havi superrigardon pri la pagoj de niaj klientoj. Bv. informi nin senprokraste pri la celo de la pago kun priskribo ‚Sirio’. Se ni ne ricevos respondon baldaŭ, ni devos transdoni la detalojn de via pago al la polico.”.

La filo de Chris informas la bankon, ke temas pri repago de kostoj de siria restoracio. Ĝi akceptas la klarigon. Li tamen scivolas, ĉu vere bankoj legas ĉiujn pagkialojn de ĉiuj transakcioj kaj plu enketas. Lotta de Meulenaere de la financa apo Payconiq by Bancontact klarigas: „Ĉiu banko havas ilojn, kiuj aŭtomate kontrolas la pagkialojn per sekretaj algoritmoj kun la celo detekti fraŭdon kaj terorismon.” Ke la vorto „Sirio”, eble kombine kun ronda sumo, estas parto de tiu sekreta algoritmo, iĝis do nun konate!