Moderna vivo

SERBIO

Ĉampioneco pro kovimo

Komence de ĉi tiu jaro, Serbio havis rekordan kvanton da vakcinitaj homoj, sed nun la rekordo rilatas al la nombro de malsanuloj pro kovimo.

Multaj homoj decidis ne vakciniĝi, kvankam Pfizer, BioNTech, Sputnik V, Sinopharm, Oxford AstraZeneca (kaj lastatempe ankaŭ Moderna) estas vakcinoj aprobitaj de la serba reguliga agentejo pri kuraciloj kaj medicinaj aparatoj.

„Ne estas tempo por pripensi, sed por urĝe komenci la devan vakcinadon de sanlaboristoj, kaj poste de aliaj grupoj de loĝantoj, kiuj havas gravan riskon aŭ povas amase infekti aliajn pro la naturo de la laboro, kiun ili faras”, diras Predrag Kon, konata serba epidemiologo.

Gravaj problemoj

Ĝis nun 2,7 milionoj da homoj ricevis la vakcinon (unua, dua kaj tria dozoj). La ĉina vakcino Sinopharm plej konsumiĝis (3,4 milionoj da dozoj), sekvata de Pfizer (1,2 milionoj), tamen ĝis nun mortis preskaŭ 10 000 homoj, kaj la nombro de infektitoj kreskas. La malsanulejoj estas plenaj.

„Ĉirkaŭ 52 elcentoj de la plenkreska serba loĝantaro ricevis vakcinon kontraŭ COVID-19”, diris Mirsad Djerlek, ŝtata sekretario de la Ministrejo pri Sano. Tio ne sufiĉas por atingi kolektivan imunecon, kvankam Serbio komencis amasan vakcinadon en januaro, antaŭ aliaj landoj en la regiono.

La nesufiĉa nombro de vakcinitoj – precipe ĉe la plej juna loĝantaro – indikas mankon de fido ne nur pri la efikeco de vakcinoj, sed ankaŭ pri la graveco de la sekvoj pro la malsano, kiu forprenis tiom da vivoj en Serbio. Lastatempaj datumoj sugestas, ke la nombro baldaŭ povos esti pli granda ol 10 000.

Eksterordinare

La itala milionulo Gianluca Vacchi estis vakcinita en Beogrado, kaj poste per Instagram – kie lin sekvas 20 milionoj da homoj – li publike dankis Serbion.