Lingvo

AKTUALE

Plena statuso por la irlanda lingvo

Ekde la 1a de januaro 2022, la irlanda lingvo plene funkcias kiel unu el la oficialaj lingvoj de Eŭropa Unio, tiel gajnante plenan agnoskon ene de la internacia organizaĵo. Tio signifas, ke ĉiuj dokumentoj eldonataj de la Unio estos ekde nun tradukataj ankaŭ en la irlandan.

La prezidento de Irlando, Michael D. Higgins, bonvenigis tiun paŝon asertante, ke temas pri grava rekono je internacia nivelo „de nia specifa identeco kiel popolo kun aparta lingvo nia, kiun ni uzas apud ĉiuj el la aliaj lingvoj, kiujn ni uzas kaj respektas”.

Natura deziro

Tiu rekono signifas la finon de la subrangeco de la irlanda lingvo ene de EU, kiu ekzistis ekde la jaro 2007, kiam la irlanda formale agnoskiĝis kiel oficiala lingvo, sed nur limigitaj kvantoj da dokumentoj estis eldonataj en ĝi. La irlanda prezidento ne mencias la fakton, ke la aldono de pliaj lingvoj al la jam granda nombro de oficialaj lingvoj en EU certe komplikos kaj pli multekostigos la funkciadon de la organizo, sed kompreneble ĉiu popolo nature deziras, ke la propra lingvo estu respektata tiom kiom la ceteraj.