Scienco

ALCHEJMERO

El Kubo jen ebla brido al forgesemo

La procezo de maljuniĝo de la kuba loĝantaro plirapidiĝis (fine de 2020, 21,3 elcentoj aĝis 60 jarojn aŭ pli), kaj inter la diversaj demencaj afekcioj ĉe grandaĝaj maljunuloj la morbo de Alchejmero okupas elstaran lokon. Tial kubaj sciencistoj daŭre penas krei medikamentojn, kiuj malfermu esperigan vojon rilate al la kuracado de tiu sanproblemo. Ĉi tiu neŭrodegenera malsano, ja pli ofte trafanta maljunulojn, estas la sese plej ofta mortokaŭzo en Kubo. Ĉiujare, la 21an de septembro, oni celebras la mondan tagon de la alchejmera malsano.

Inter aliaj kuraciloj, la Centro pri Molekula Imunologio de la kariba insulo kreis novecan formulon de la rekombinita homa hormono eritropoetino (EPO). Ties nomo estas NeuroEPO, kaj ĝin karakterizas malalta enhavo je siala acido (izomorfo kun konsisto simila al tiu de la natura hormono EPO produktata en la centra nerva sistemo). Ĝi montris neŭroprotektan efikon kontraŭ diversaj cerbaj damaĝoj ĉe bestoj, kaj oni sukcese finis klinikan dufazan testadon en pacientoj trafitaj de leĝera kaj modera formoj de la alchejmera malsano. La bonaŭguraj rezultoj atingitaj pruvis, ke la medikamento efektive haltigas la progresadon de la malsano. Tiu ĉi terapio celas igi pli malrapidaj la neŭrodegeneran evoluon kaj la malpliboniĝon de kognaj simptomoj, altigante samtempe la vivkvaliton de la pacientoj samkiel de iliaj familioj. La fabrikmarko de NeuroEPO estas NeuroCIM. Oni aplikas la kuracilon per naza vojo.

Tria fazo bezonata

La centro pri ŝtata kontrolo de medikamentoj, ekipaĵoj kaj medicinaj aparatoj de Kubo (hispana akronimo: CECMED) ebligis jam la plenumon de tria fazo de klinika testado. Estas fakte postulate, ke oni efektivigu plian klinikan teston pri tiu ĉi medikamento, por povi konfirmi la rezultojn atingitajn dum la antaŭaj fazoj kaj oficialigi la sekurecon de tia terapio.

Aloysius (Alois) Alzheimer, naskiĝinta la 14an de junio 1864 kaj mortinta la 19an de decembro 1915, estis germana psikiatro kaj neŭropatologo. Li unuafoje priskribis iun malsanon, kiu kaŭzis mensan konfuziĝon kun ĉiuj ĝiaj simptomoj. Tiu poste nomiĝis la malsano de Alchejmero.