Lingvo
KELTA LINGVARO
Manksa reviviginto vivas ne plu
MONATO jam raportis (2008/04, p. 14) pri la vivo kaj verko de la manksa verkisto kaj fizikisto doktoro Brian Stowell, kiu revigligis la supoze mortintan manksan lingvon, subvarianton de la gaela lingva familio. Post longa malsano Brian Stowell mortis. Neniu pli kontribuis al la kulturo de sia eta nacio ol tiu insulano. Li postlasis riĉan verkaron en, kaj pri, la manksa.
La verkaro de Stowell inkluzivas lernolibrojn, romanon kaj eĉ tradukon de la infanromano Alico en Mirlando. Dum dudek jaroj li prezentis ĉiusemajnan radioprogramon en la manksa. Li servis kiel Prezidanto (Yn Lhaihder) de la tiel nomata Domo de Ŝlosiloj, t.e. la parlamento de la insulo, kaj en 2008 li ricevis la premion Reih Bleeaney Vanannan pro elstara kontribuo al la manksa kulturo. En 2010 li ricevis la tiel nomatan Tynwald Honour, la plej grandan honoron, kiu povas esti aljuĝata de la insulo al unu el siaj civitanoj.
Antaŭ nelonge estis postmorte eldonita lia aŭtobiografio Gaelg as Fishig: Skeeal my Vea (Manksa kaj fiziko: rakonto pri mia vivo).
Garbhan MacAoidh estas plurlingva tradukisto kaj verkisto, kiu kontribuas al MONATO ekde 1988.
| Tiu ĉi teksto aperis en la presita kaj en la PDF-forma versioj de Monato en la jarkolekto 2022, numero 08-09, p. 33. |
|
Tiu ĉi artikolo povas esti libere kopiita aŭ tradukita por nekomercaj celoj, se oni mencias la fonton:
Artikolo de Garbhan MacAoidh el MONATO (www.monato.be). Lasta adapto de tiu ĉi paĝo: 2022-07-03 |