Moderna vivo

SOCIO

Rajto al reedziniĝo en Ĉinio

En la pli ol dumiljara feŭda Ĉinio, dum la tuta vivo virino havis nur unu edzon. Eĉ se la edzo tuj mortis post la geedziĝo, laŭ la moroj la virino ne rajtis edziniĝi denove, kaj ŝi vivis sian postan vivon kiel vidvino.

Tiam virinoj kutime faris nur hejmajn laborojn kaj ne povis gajni monon per tio. Post la fondiĝo de Ĉina Popola Respubliko la ĉina registaro kontraŭis la longtempan moron kaj leĝe donis al ĉiuj, ĉu viroj ĉu virinoj, egalan rajton al geedziĝo.

En la moderna vivo

Nuntempe virinoj havas la eblon labori samkiel viroj en diversaj postenoj, kaj post edziniĝo ili havas la saman rajton kiel la edzo en la propra hejmo. Tio signifas, ke virino ludas la saman rolon – ĉu en la socio ĉu en la hejmo –kiel la edzo. Kompreneble virinoj havas ankaŭ la rajton divorci, se ili sentas sin malkontentaj pri la edzo en la geedza vivo.

Kvankam en Ĉinio la vivkondiĉoj pli kaj pli boniĝas, ankoraŭ nemalmultaj homoj – precipe mezaĝaj – ne kontentas pri la koncerna edzo aŭ edzino, kaj divorco fariĝas la sola maniero eskapi el malfeliĉo.

Sekvoj kiel tajdo

Tamen divorco influas ne nur la geedzojn, sed ankaŭ iliajn gefilojn. Multaj homoj longtempe cerbumas por elekti la konvenan divorcotempon kaj tiel malgrandigi la influon al la gefiloj.

En Kantono – suda ĉina urbo ekonomie disvolviĝanta – laŭ nekompleta statistiko pli ol 600 gepatroj divorcis nur kvar tagojn post kiam ilia infano sukcesis en sia enirekzameno por la universitato ¹. Tio okazas, ĉar tiam iliaj gefiloj estas plenkreskaj kaj ne bezonas multe da prizorgado fare de la gepatroj, do ili estas tre malmulte influataj de la divorco de la gepatroj. Ĝuste pro tio en Ĉinio oni diras, ke ankaŭ divorcado havas tajdon.

1. Lernantoj kun volo daŭrigi siajn studojn en universitato devas sukcesi en ekzameno post la diplomitiĝo en la gimnazia nivelo.