Verki por MONATO

MONATO tre bonvenigas kontribuojn de siaj legantoj. Antaŭ ol ekverki, bonvolu legi la jenajn bazajn regulojn:

1. MONATO akceptas nur artikolojn originale verkitajn por ĝi; do ne artikolojn, kiuj estas sendataj al pluraj revuoj samtempe, aŭ kiuj jam aperis aliloke. La aldonitaj fotoj devas esti faritaj de la aŭtoro mem, aŭ almenaŭ li posedu la permeson publikigi ilin en MONATO. Se en la foto aperas personoj, li havu la permeson de tiuj personoj, por uzi la foton kune kun la artikolo, aŭ eventuale, permeson de la gepatroj, se en la foto aperas infanoj.
2. MONATO akceptas kontribuojn nur pri fako, kiun la aŭtoro profunde konas, aŭ pri lando aŭ regiono, kiun li perfekte konas, praktike do nur pri lia propra fako aŭ pri lia propra lando aŭ regiono.
3. La uzon de pseŭdonimo MONATO permesas nur tre escepte, ekzemple por protekti personojn en totalismaj ŝtatoj.
4. MONATO aperigas prefere fonartikolojn, artikolojn, kiuj ne unuavice raportas pri faktoj, sed pri la fono malantaŭ la faktoj. Kontribuo, kiu citas, ke X iĝis la prezidanto de lando Y estas preskaŭ superflua, ĉar tion oni povis legi supozeble jam aliloke. Sed raporto, verkita de loĝanto de Y, kiu reliefigas kial X venkis, pro kiuj maŝoj en la elekto-proceduro, kion la homoj pensas pri li ktp, jen io por internacia magazino.
5. Bv. atenti, ke MONATO publikigas tekstojn en sed ne pri Esperanto. Do ne sendu primovadajn artikolojn.
6. La redakcio de MONATO ricevas kutime tro da manuskriptoj. Bonvolu do kompreni, ke koncizaj artikoloj havas pli da ŝanco aperi, ol longaj (por iuj kontribuoj MONATO fiksis maksimumon: leteroj (150 vortoj), raportoj (1500 vortoj), eseoj (2000 vortoj).

Kien sendi la manuskriptojn?

Manuskriptojn por MONATO vi sendu rekte al ĝiaj redaktoroj per retpoŝto. Vi povas trovi la adresojn de la redaktoroj en kiu ajn numero de MONATO, kutime en paĝo 2, kaj en la adresaro. Sendu la tekston en ordinara retmesaĝo, do ne kiel DOC-, PDF-, ODT-, SXW- aŭ alian aldonaĵon.

Registritaj kunlaborantoj povas sendi siajn kontribuojn rekte al la redaktoro per nia teksto-kontrolilo.

Kune kun la unua manuskripto la aŭtoro sendu sian portretfoton, kaj malgrandan du-tri-linian priskribon pri si mem. Jen kelkaj specimenaj sinprezentoj de kunlaborantoj de MONATO.

Kiel verki la manuskriptojn?

Vi uzu unikodon (ĉiuĵaŭde) aŭ la ikso-surogaton (cxiujxauxde). Ne uzu la butonojn de via poŝtoprogramo por indiki kursivigojn kaj dikigojn, sed la jenajn simplajn kodojn:

• <t> komenciĝo de titolo
• <it> komenciĝo de intertitolo
• <p> komenciĝo de alineo
• <k> komenciĝo de kursivo
• <c> komenciĝo de citaĵo

...

• </t> fino de titolo
• </it> fino de intertitolo
• </p> fino de alineo
• </k> fino de kursivo
• </c> fino de citaĵo

Pliajn detalojn vi trovas en la teknika konvenciaro de MONATO, kie eblas trovi ankaŭ ĉion necesan por pli kompleksaj tekstoj (ekzemple tabeloj, neaskiaj literoj ktp.).

Frazoj ne enhavu pli ol 30 vortojn. Evitu komojn kaj punktokomojn, sed prefere komencu novan frazon.

Alineoj ne estu pli longaj ol 150-vortaj.

Fotoj

Se iel eble la kontribuantoj bonvolu aldoni fotojn en .JPG-formo aŭ .TIFF-formo. Plej ofte en la fotilo oni povas agordi la distingivon de la fotoj. Elektu „alta” aŭ „granda” aŭ „fajna”. Do ju pli granda la formato de la bildo, des pli bone. Tro grandan bildon la grafikisto povas malgrandigi, sed tro malgrandan li ne povas grandigi sen perdo de kvalito.

Sendi tiel grandajn dosierojn ne ĉiam eblas per retpoŝto. Por sendi ilin vi iru al https://monato.wetransfer.com kaj sendu de tie (noto: tiu vojo ne funkcias el Rusio kaj Belorusio). Pliajn donitaĵojn pri ilustraĵoj vi trovos en nia rubriko fotoj.

Honorario

Se kontribuanto ne estas abonanto, li/ŝi ricevas bitan version de la numero en kiu aperis lia/ŝia artikolo. Post kiam tri artikoloj estos publikigitaj, li/ŝi povas peti kunlaborkontrakton, kiu i.a. fiksas (modestan) honorarion. La alteco dependas de pluraj faktoroj, kiel lingva kaj ĵurnalisma lerto kaj la apliko de la ĉi-supre priskribitaj konvencioj.